الوصفة دي مخصوصة لعشاق الأكل البحري، خفيفة وحلوة جداً وده اللي هانشوفه دلوقت .. يلا جيبي السمك المفروم وحطيه في طبق واخلطيه مع البصل، والبقدونس، والفلفل الأسود، والملح، وبعدها قسمي الخليط ده على 12 قطعة متساوية، وشكّلي كل قطعة على شكل صوابع أو دائرية زي ما تحبي.
بعد لما تخلصي تشكيل صوابع كفتة السمك، إشويها على نار متوسطة لمدة 5 أو 6 دقائق في زيت الزيتون على كل جنب لغاية ما تستوي كويس، وطلعي الصوابع من الزيت في طبق وخليها على جنب.
نيجي بقى للصلصة الحارة، إخلطي البصل في حلة مع الملح،والثوم، والكزبرة، والفلفل الأخضر، والتوابل، والمشروم، وطبعاً الطماطم، وكمان خلطة المكرونة البولونيز وعليهم 3 كوبيات ماية.
خلي الخلطة الرائعة دي بقى على نار متوسطة لغاية لما تغلي، بعدها هدي النار على الحلة وخليها لمدة 10 دقائق، وضيفي بعدها صوابع كفتة السمك للصلصة بهدوء عشان ماتتكسرش منك، وخليها 5 دقائق على نار هادية وقدميها مع رشة بقدونس على الوش .. وصحتين على قلبكم.
| تعليمات: – يرجى وضع اللحوم في الفريزر، والخضروات في الثلاجة في حالة عدم تسوية أي منها في نفس اليوم حتى لا تفسد. – يجب الاهتمام بدرجة حرارة النار حسب طريقة العمل المكتوبة حتى لا تؤثر على تسوية المكونات. – البهارات والملح والمكونات الحارة الموجودة في الصندوق يمكن استخدامها حسب الرغبة أو الاستغناء عن أي منها. |
